السلام عليكم ورحمة الله وبركاته،،
هذي قصيدة كاتبها الشاعر:فهيد العصيدان..
رثاء بعمه الراحل الامير:فهيد بن عصيدان..
اخليكم مع المرثية...
**************************
لاخير فالدنيا ولا فإقبالها
تِبكيك .. لوتقبل بضحك حجاج
زاحت زحازيحٍ يخلَّد ذكرهم
في وقتنا والا على الأسراج
وأتلى قلايعها .. عظام السيره
وإخيار من فوق البسيطه داج
مدراس" بالمرجله والحكمه
سلومهم وعلومهم منهاج
الأولي سالم* زبونه سالم
يفزع لاعانق نومه الهلباج
وفهد* مقر الطيب ذرب المنطق
امعدّل اللي في لغاه اعواج
وعلي* عليّ الراس طلق اليمنا
اللي فعوله تلطم الهرّاج
ومحمّد* اللي لاتوجّه جاهه :
كم من سجين جاه علم افراج
راحوا وحنا نقتدي بخْطاهم
وقاماتهم فوق الرجال ابراج
واليوم .؟ يايوم الخميس الاسود
حزين .. والتعبير مايحتاج
أمست مشاحينٍ وهي مشحونه
وشعاب غنوى دمعها درّاج
ولحدادها .. عمّ الحداد الوادي
افواج .. عزت بالفقيد افواج
من النعيريه , لمدخل جوده
ومن الجويّات , لطوارف ثاج
على عزا شيخٍ وهيبة بشته
ظل" على الدار وذرى وسياج
أوفيت ياعبدالكريم* الخطبه
تبكي وحنا دمعنا زعِّاج
خليت راسي سابحٍ بدموعي
مثل الغريق ألاطم الامواج
ليه استحي من دمعتي وأخفيها
يشره عليها حزني الهيّاج
لو انها عشقه ؟ عشقت وبنسى
ولو انها علّه ؟ لقيت علاج
لكنّها نيران فقد وفرقا
بين الضماير ضوهّا وهّاج
أونس حموّتها من أقصى جوفي
واحسّ لاهبها لهيب الصاج
لي شرهةٍ تلحق سمان بيوتي
ان كان ماجاها عليّ إنتاج
بالقامه اللي في رثاها تصغر :
الاقلام .. والاوراق .. والادراج
أكبر مقام بالشعر طرّيته
مالومه ان كان اعتراه .. إحراج !
عمّي , ونوماسي , وعزّي , واسمي
عليه .. واسمه فوق راسي تاج
إليا ضحك تضحك لضحكه غنوى
طلاقة كفوف , وسماح حجاج
صدره رحيب .. ويتسع للدنيا
على الرفيق أنعم من الديباج
وإن ضاق والله ماتجي في صفه :
هيبة كْليب .. وسطوة الحجاج
يفزّ لامنّه نصاه الشاكي
وأقسى على المخطي من الكرباج
هدّاج تيما .. عند أهلها يرهي
وعند اهل غنوى .. يرهي الهدّاج
كم من حْوارٍ ماأهتنى حدر امّه
لوكان تخلج من بعدْه اخلاج
ماتتعب القصاب .. غير اسمانه
لسان حاله .. يالله المخراج !
ولاأذكر انّه قد تقفل بابه
يامركّبه .. وش داعي المزلاج ؟!
مركاه يشهد في حراك كفوفه
للضيف .. والمرّار .. والمحتاج
فـ يالله تعين اللي ماجاها علمه
بديار غُرب .. وسافرت لعلاج
أخيّها وسط القبر متكفّن
وهْي عجوز .. وقلبها خجّاج
الله يصبرها ويجبر كسرها
ماغيره اللي لـ الحزن فرّاج
فـ ياجعل غراً يلتعج بارقها
يومض وينْور مثل نور سراج
تعلّ قبره لين يروى منها
ويِزهر وتِزهر من وراه افجاج
أدعي بجاه اللي يجيب الدعوه
من بأمره الإسراء والمعراج
أعدها وأردها وأحصيها
ماطاف .. والا لبوا الحجاج ,
.
.
.
تحياتــــي..
أنت غير مسجل في منتدى الشاعر محمد المجول . للتسجيل الرجاء إضغط هنـا
الإهداءات
« آخـــر الـــمـــشـــاركــــات »
مرثية فهيد العصيدان..
العرض العادي
